اللہ تعالیٰ مصور ہے چونکہ اس نے کروڑوں‘ اربوں صورتیں بنائی ہیں جو دیکھنے میں ایک دوسرے سے جدا ہیں‘ پھر ہر ایک کی خصوصیات الگ ہیں۔ یہ کام سوائے خدا کے اور کوئی نہیں کرسکتا اس لیے اسے مصور کہا جاتا ہے۔ اللہ تعالیٰ نے اپنی اس صفت کو خود یوں فرمایا ہے کہ وہ ماں کے پیٹ میں تمہاری جیسی شکل چاہتا ہے بنادیتا ہے۔ کسی کو گورا کسی کو کالا‘ کسی کو مرد اورکسی کوعورت بنادیتا ہے۔ اس سے معلوم ہوا کہ اصل صورت بنانے والا اللہ ہی ہے اور یہاںکے مصور صرف اس کی بنائی ہوئی تصویروںکی نقل اتارنے والے ہیں۔ اسی لحاظ سے حقیقی مصور اللہ تعالیٰ ہے۔ یہ اسم جلالی ہے۔ اس کے فوائد حسب ذیل ہیں۔

بچہ خوبصورت پیدا ہونے کا عمل

جو عورت یہ چاہتی ہو کہ اس کی اولاد خوبصورت پیدا ہو تو اسے چاہیے کہ حمل ٹھہرنے کے تین ماہ بعد اس اسم کو سوتے وقت 336 مرتبہ پڑھنا شروع کردے اور بچے کی پیدائش تک اسے پڑھتی رہے۔ انشاءاللہ جو بچہ یا بچی پیدا ہوگی وہ خوبصورت اور صحیح سلامت پیدا ہوگی۔

حمل گرنے کا علاج

جس عورت کا حمل ٹھہر کر گرجاتا ہو اور اکثر اوقات اسی پریشانی کا سامنا رہتا ہو تو اسے چاہیے کہ حمل ٹھہرنے کے بعد یَاحَیُّ یَاحَافِظُ یَامُصَوِّرُ 40 دن تک روزانہ 1100 مرتبہ پڑھے۔ ایک مقررہ وقت اور مقررہ مقام پر پڑھے تو زیادہ بہتر ہے۔ انشاءاللہ اللہ تعالیٰ کی رحمت سے حمل محفوظ رہے گا۔

نرینہ اولاد کے حصول کا عمل

ایسی عورت جس کے ہاں اولاد نہ ہوتی ہو تو اسے چاہیے سات روزے رکھے اور روزہ افطار کرنے کے بعد یَامُصَوِّرُ اکیس مرتبہ پڑھ کر پانی پر دم کرکے پیے۔ انشاءاللہ اس کے گھر فرزند صالح پیدا ہوگا۔ اس عمل کی اجازت کسی ولی کامل سے لینا ضروری ہے۔

نئی چیزوں کی ایجاد میں آسانی

ایسے کاروباری حضرت جو نئی نئی چیزیں بناتے ہیں جس میں ازحد اس بات کا اندیشہ ہوتا ہے کہ نئی تخلیق مارکیٹ میں چلے گی کہ نہیں تو ایسے لوگوں کیلئے اس اسم کا کثرت سے ذکر بہت مفید ہے کیونکہ اس اسم کے پڑھنے سے اللہ کی مدد عقل کے ساتھ شامل حال ہوجاتی ہے۔ اس کے علاوہ سخت محنت کرنے والے اگر اسے پڑھیں تو ان کے کام میں آسانی ہوجائے گی۔ اسی لیے دستی کام کرنے والے مثلاً لوہار‘ درزی وغیرہ کیلئے بہت موزوں ہے۔

کام میں آسانی کا عمل

جو شخص اسے 21 دن تک روزانہ 5000 مرتبہ پڑھے اور اول آخر گیارہ گیارہ بار درودشریف پڑھے اس کے کام میں آسانی پیدا ہوجائے گی۔ کام خواہ کتنا ہی مشکل کیوں نہ ہو عمل کے ختم ہوتے ہی انشاءاللہ کام بن جائے گا۔

ایک عامل کا قول ہے کہ اگر کوئی وضو کرکے اپنی پیشانی پر شہادت کی انگلی سے اس اسم کو لکھ کر جس سے ملاقات کرے وہی دوست بن جائیگا۔

عالم ارواح میں صورتوں کا مشاہدہ

ایسا سالک جس کا باطن کھل چکا ہو اور اس پر کشف کے حالات واضح ہوجاتے ہوں اگر وہ عالم ارواح کی صورتوں کا مشاہدہ کرنے کی غرض سے اس اسم کو روزانہ 12500 مرتبہ 40 دن تک پڑھے تو اسے عالم ارواح کی صورتوں کا روحانی مشاہدہ حاصل ہوگا۔